كلنا بنصلي علي السجادة
كلنا بنصلي علي السجادة
وفينا اللي واخد الصلا عبادة
وفينا اللي واخد الصلا عادة
وفينا اللي تاب واللي نفسه يتوب
وفينا اللي في الذنوب مازال بيتمادا
بنقتل القتيل وبنمشي في جنازتة
وبناخد السكر معانا في الدروه
علشان منشربش القهوة سادة
بنخون ونبيع العيش والملح
وبنستغفل بعض بكل بلاده
وبنحلف إننا قبلنا الصلح
واحنا في شرب الدم جرادة
يا اخوانا البلد ولاده
فيها من الرجال عناتر وعناتر
هاتلي واحد مقلش رقبتي سدادة
وأما تقوله هات ما عليك
تتبدل الضحكة المعتادة
بنبكي في الجامع وفي الكنيسة
وبنأمن بمحمد وبنأمن بعيسي
وبندي للحرامي أرفع قلادة
ونسينا أبطال حرب أكتوبر
اللي عايشين واللي نالوا الشهادة
وشوهنا كل تاريخ القادة
وعملنا أفلام مسروقة ومتعادة
والبطل فيها للأسف ملوش عازة
وحفظنا كل تاريخ صافيناز
ونسينا تاريخ إبراهيم الرفاعي
وإختراعنا مصطلح عبيد البيادة
أمتى بقى نبطل فساد
علشان تتقدم بينا البلاد
وننام بهدوء علي الوسادة
ونتطمن علي روحنا ياسادة
ونصلي بخشوع علي السجادة
كلنا بنصلي علي السجادة
بقلم الشاعر يوسف الحمله
13/7/2016
ليست هناك تعليقات:
إرسال تعليق