يادنيا مالك بقلم الشاعر احمد منسي

يادنيا مالك

لولا خوفى من الله

واملى فى لقاه

لطوعت شيطانى

ولبيت نداه

وكفرت بوجودى

وفارقت الحياة

فى إيه يادنيا مالك

بتمرمغينى ليه فى ترابك

وسيبه عليا كلابك

وكل مالجألك قفله بابك 

ومتربساه

يادنيا نفسى أفهمك بس مش عارف

نفسى أعيش فيكى وأنا مش خايف

يادنيا هو الفرح إتلغى ولا أنا مش شايف 

ولا انتى مخبياه

صحيح يا دنيا ليكى العجب

لا نافع فيكى انحراف ولا أدب

وسايقه العوج ومعنده 

وركبه راسك
هو العيب فيكى ولا فى ناسك

ولا أنا اللى مش فهمك وظلمك

وظالم ناسك

طاب فهمينى انتى
فرقتى ليه يادنيا بينى وبين حبيبتى

ورخصتى سعرى وقللتى قيمتى

وحوجتينى للى مايتأمنوش وانتصارك

مايكنش إلا فى هزمتى

فهمينى 
ليه حضنك الدافى مبقاش بيدفينى 

وبحرك الواسع مبقاش يروينى

وشمسك حرقت وشى 

وقمرك مبقاش يطلع فى ليلى

فهمينى
ولا أقولك سيبك انتى واسمعينى

صبرى من إيمانى إيمانى من دينى

يارب انت القوى أرحم ضعفى وقوى إيمانى